13. Ankiaje Maaroni Awentaantsipankopaye.Jaawentakanteri Eejatzi Inkempoyeneri Irañamento Atziripaye.
Eero akowakotawakajaro awentarontsi nampitsikipaye tsikanta osaiki ashinonkaantsi. Imonkaratakairi atziripaye tsika okanta ojewatsi antawaire ashi awentaantsipankoki anampitsitekipaye.
Ijewatantyarori Awinkatsarite antawairentsika ontzimatye:
(a) ijewatakante antawairentsi ashi amakowentyaroneri mantsiyarentsipaye iroperori areyetachari anampitsitekipaye;
(b) Iramaeyaro mantsiyarentsipaye jamiri kokaweripayeni;
(c) impayetajeri iroperanto nijaa maaroni atziritepayeni eejatzi jamakowentyaaro eero yapitsatantairo aipatsite;
(d) ijewatakante iroperori antawairentsi ashi shintsiripaye mantsiyarentsi saikayetatsiri anampikipaye;
(e) jiyometaantero tsika ikantaita ikempoyetziro añamento;
(f) yaretakajiaro antawaire awentarontsi nampitsikipaye tsikanta okowityaperota awentarontsi eejatzi ashinonkantsi. Jananekipaye, ashitaniyetachari, kenkiwaripaye eejatzi antaripaye atziri ashinonkainkari iritake jampitakoperote;
(g) ijewatakajero antawairepaye awentarontsi anampitsitekipaye eejatzi imonkarateniro antawairepaye tsika okanta ojewatsi;
(h) Yampitakotajero tsinanepaye eero itzimanta osheki eentsite eejatzi irawentero aririka intsime eentsite;
(i) eero ikowakotsiri atziritepaye jatatsineri irawentya awentarontsiki irashi Pinkatsari eejatzi irashiki kirepakoripaye;
(j) ijewatakantero antawairentsi ashi awentarontsi irashi atziritepaye kaari tzimatsine ireekite yantyari awentarontsi. Impero kireeki amenakantsirori awentarontsi onkantya awentantyariri maaroni atzirite osankenatakotane ashi awentarontsi;
(k) ijewatakantero antawairentsi ayotantajiarori tsika ikantaitziro jawentantaitsi;
(l) ari jantaritakakeri oireekite jewatakantzirori awentarontsi;
(m) jiyometsajeri antawairiantsipaye ashi awentarontsi yotaantsi owakerari iroperori iraawentantyariri atziripaye.
(n) Ijewatakantero antawairentsi ashi owakerari yotaantsi awentarontsiki ashi anampitsite eejatzi irashi wirakocha;
(o) impinkatsatakantero antawaire ashi jewatakantzirori awentarontsi.
